Zjarri që ka përfshirë fshatin Udënisht në Pogradec vazhdon të jetë aktiv në njërën prej vatrave. Ndërsa vatra e parë është izoluar dhe shuar, përpjekjet tani janë të përqendruara tek vatra e dytë, e cila paraqet sfida të mëdha për shkak të terrenit të vështirë dhe bimësisë së dendur që ndihmon përhapjen e flakëve.
Në zonë po punojnë mbi 20 efektivë zjarrfikës, si dhe punonjës të shërbimeve pyjore dhe të zonave të mbrojtura, të cilët janë angazhuar pa ndërprerje për të penguar zgjerimin e zjarrit dhe për të siguruar shuarjen e tij të plotë.
Drejtuesi i zjarrfikëses së Pogradecit ka bërë të ditur se vëmendja është e gjitha tek vatra e dytë. Pavarësisht kushteve të vështira dhe erës që e bën edhe më sfiduese ndërhyrjen, shpresohet që flakët të vihen nën kontroll brenda orëve në vijim.
