Një operacion i Policisë së Shtetit ka çuar në arrestimin e administratorit të një subjekti privat dhe në procedimin penal të disa zyrtarëve lokalë, pas evidentimit të një ndërtimi pa leje në zonën turistike të Voskopojës.
Strukturat e Drejtorisë Vendore të Policisë Korçë, bazuar në informacione operative, arrestuan në flagrancë shtetasin I. K., 63 vjeç, i cili dyshohet se kishte ndërtuar pa leje disa bazamente betoni në aksin rrugor Korçë–Voskopojë, me qëllim ngritjen e godinave, pa dokumentacionin e nevojshëm ligjor.
Në vijim të hetimeve, u proceduan penalisht edhe dy punonjës të Inspektoratit të Mbrojtjes së Territorit (IMT) të Bashkisë Korçë, shtetasit I. L., 54 vjeç, me detyrë Kryeinspektor, dhe E. K., 36 vjeç, me detyrë Inspektor. Ata dyshohen për shpërdorim detyre, pasi nuk kryen kontrollet ligjore dhe nuk njoftuan në kohë Policinë mbi ndërtimin e paligjshëm.
Po ashtu, janë pezulluar nga detyra dhe janë marrë masa disiplinore të rënda ndaj Inspektorit A. B., ndihmës/specialist i rendit (SPZ), Nënkomisarit E. P., specialist për hetimin e krimeve në Komisariatin e Policisë Korçë, si dhe Nënkomisarit P. B., koordinator i ndihmës/specialistëve të rendit në zonë. Ndaj tyre ka nisur një hetim disiplinor i thelluar nga Drejtoria e Standardeve Profesionale në Policinë e Shtetit.
Policia e Korçës apelon qytetarët dhe bizneset të mos ndërmarrin ndërtime pa leje dhe të mos zënë hapësirat publike në mënyrë të paligjshme, duke paralajmëruar se shkelësit do të përballen me pasojat ligjore.
