Kryeministri Edi Rama ka vlerësuar Korçën si një model të mirë të menaxhimit të territorit, ku, sipas tij, ka më pak problematika në krahasim me zona të tjera të vendit. Megjithatë, shefi i qeverisë theksoi se aksioni kundër ndërtimeve pa leje do të vazhdojë edhe në të gjithë territorin e qarkut.
Deklaratat kryeministri i bëri gjatë një takimi me deputetët e Tiranës, ku iu përgjigj edhe kritikave për shembjet në Theth. Ai bëri me dije se në këtë zonë janë prishur 40 objekte pa leje, ndërsa shtoi se pronarët e tyre nuk janë banorë të zonës, por persona që kanë ndërtuar për qëllime fitimi. Sipas Ramës, policia ka nisur hetimet për të zbuluar se “kush është mbrapa pushtimit të zemrës së Thethit.”
“Shkodra, Lezha, Durrësi, Tirana, Vlora, Fieri, Elbasani, Korça, në vijën bregdetare nuk po i numëroj të gjitha njësitë, duhet të ketë një presion të rritur ndaj të gjithë atyre që ndërtojnë dhe tentativave për të ndërtuar pa leje dhe për të zaptuar territor,” u shpreh Rama, duke paralajmëruar vijimin e aksionit në shkallë vendi.
Kryeministri shtoi se po mblidhen informacione për të gjithë territorin, ndërsa është ngritur një grup prej 80 arkitektësh që do të projektojnë ripërtëritjen e hapësirave që do të lirohen nga ndërtimet pa leje. Ai nënvizoi se nuk do të ketë asnjë tolerancë ndaj atyre që uzurpojnë hapësirat publike, duke theksuar se në zonat urbane “nuk mund të ketë trotuar privat.”
“Do të bëjmë një reformë dhe shumë shpejt, mbase për shkak të emergjencës për këtë dhe ujin e pijshëm. Do na duhet të bëjmë deri akt normativ dhe ato 83 mandate do t’i vëmë në shërbim të qytetarëve që kërkojnë kapërcim përfundimtar nga Shqipëria Europiane në mendje, te Shqipëria anëtare e BE. Në këtë aspekt po bëjmë gjënë e duhur dhe duhet të vazhdojmë ta bëjmë,” deklaroi Rama.
Ai nënvizoi se hapësirat publike janë të përbashkëta dhe se nuk ka pronë private rreth e rrotull pallateve të reja, pasi leja e ndërtimit jepet vetëm për vetë objektin.
Ndërsa Korça shihet si shembull pozitiv në këtë drejtim, qeveria paralajmëron se aksioni për lirimin e hapësirave publike dhe ndalimin e ndërtimeve pa leje nuk do të ndalet as në këtë qark, për të siguruar një zhvillim urban të qëndrueshëm dhe sipas standardeve europiane.
