Lëvizjet në administratën vendore në juglindje të vendit po vijojnë me intensitet. Pas shkarkimit të tre administratorëve të njësive në Bashkinë Kolonjë dhe dorëheqjes së shtatë administratorëve në Bashkinë Korçë, ndryshimet kanë prekur së fundmi edhe Bashkinë Devoll.
Katër administratorët e njësive administrative në Devoll kanë paraqitur dorëheqjen pranë kryetarit të bashkisë, Eduard Duro. Largimet janë dorëzuar vetëm pak minuta më parë dhe lidhen me thirrjen e fundit të Kryeministrit Edi Rama për ristrukturimin e administratës vendore.
Në bashkitë e Pogradecit, Maliqit dhe Pustecit ende nuk raportohet për zhvillime të reja. Bashkia Pustec, ndryshe nga të tjerat, nuk ka njësi administrative, çka e përjashton aktualisht nga ky proces.
Situata në qarkun e Korçës mbetet dinamike dhe priten lëvizje të tjera në ditët në vijim. Burime politike sinjalizojnë gjithashtu një vizitë të afërt të Kryeministrit Rama në Korçë, e cila mund të sjellë zhvillime të mëtejshme në pushtetin vendor.
