Skuadra e Skënderbeut ka zyrtarizuar një tjetër afrimin e radhës në këtë merkato vere, duke forcuar ndjeshëm mesfushën. Mesfushori afrikan Salim Abubakar, i formuar në akademinë e Sassuolos në Itali, ka mbërritur sot në Shqipëri dhe tashmë është në Korçë, ku pritet të prezantohet zyrtarisht.
22-vjeçari, i cili ka pritur prej javësh për përfundimin e procedurave dokumentare, do t’i bashkohet nesër skuadrës në seancën e parë stërvitore, ku do të zbresë në fushë për herë të parë me fanellën bardhekuqe.
Abubakar ka një përvojë të konsiderueshme për moshën e tij. Krahas Sassuolos dhe Pergoletteses në Itali, ai ka qenë pjesë edhe e përfaqësueses së Nigerit në tri ndeshje zyrtare, duke vepruar si mesfushor qendror me karakteristika të një “box-to-box”, pra tipike për një numër 8.
Ky është afrimi i dytë për klubin korçar në këtë merkato, ndërsa merkatoja vazhdon të mbetet aktive. Objektivi është i qartë: ndërtimi i një ekipi të fortë që do ta rikthejë Skënderbeun në elitën e futbollit shqiptar.
