Në stadiumin “Skënderbeu” u zhvillua një ndeshje miqësore me aromë ndërkombëtare, mes veteranëve të Skënderbeut dhe përfaqësuesve të ekipeve më të njohura të Selanikut – Aris, Iraklis dhe PAOK.
Takimi ishte një festë futbolli dhe nostalgjie, ku emra të njohur të futbollit korçar dhe shqiptar zbarkuan sërish në fushë për të treguar se klasi nuk harrohet kurrë.
Skuadra e veteranëve të Skënderbeut dominoi ndeshjen, duke fituar bindshëm me rezultatin 5-1. Protagonistë absolutë ishin Migen Memelli dhe Rigels Qosa, të cilët shënuan nga një dygolësh secili, si dhe Bledi Kadiu, që vulosi fitoren me një tjetër gol.
Kjo ndeshje tregoi jo vetëm shpirtin sportiv të veteranëve, por edhe formën e shkëlqyer fizike që kanë ruajtur. Aktiviteti shërbeu si promovim i vlerave të traditës sportive të qytetit të Korçës dhe respektit ndaj figurave të futbollit të dikurshëm.
