Drejtoria Vendore e Policisë Korçë ka referuar disa materiale në Prokurori lidhur me ngjarje të ndryshme të ndodhura në territorin e qarkut, për të cilat janë nisur procedime penale ndaj disa shtetasve.
Specialistët për Hetimin e Krimeve në Komisariatin e Policisë Maliq kanë nisur procedim penal ndaj shtetasit F. F., 65 vjeç, i cili u kap duke kryer punime ndërtimi pa leje. Po ashtu, ndaj shtetasit E. H., 44 vjeç, banues në fshatin Dardhas të Pogradecit, është filluar procedimi pasi u kap duke transportuar rreth 20 metër kub lëndë drusore të prerë në kundërshtim me ligjin. Lënda drusore u sekuestrua në cilësinë e provës materiale.
Ndërkohë, specialistët për Hetimin e Krimeve në Komisariatin e Policisë Pogradec kanë nisur procedim penal ndaj shtetasve I. T., 53 vjeç, P. P., 35 vjeç, J. M., 26 vjeç dhe J. M., 52 vjeç, të gjithë banues në Pogradec, pasi dyshohet se janë përfshirë në një përplasje fizike me sende të forta, për shkak të një konflikti pronësie.
Gjithashtu, më datë 18.07.2025, në kodrat e fshatit Çërravë, ka rënë zjarr në një sipërfaqe me bimësi. Shërbimet zjarrfikëse ndërhynë në kohë për shuarjen e flakëve, ndërsa po vijon puna për zbardhjen e rrethanave të ngjarjes dhe identifikimin e autorëve të mundshëm.
Në një tjetër ngjarje, rreth orës 02:40 të mëngjesit, në bulevardin “Gjergj Kastrioti” në Korçë, dyshohet se ka rënë aksidentalisht zjarr në një lokal në pronësi të shtetasit G. Xh. Nga flakët janë shkaktuar vetëm dëme materiale. Grupi hetimor po punon për zbardhjen e plotë të rrethanave të kësaj ngjarjeje.
Materialet procedurale i janë referuar Prokurorisë për veprime të mëtejshme hetimore.
