Në kuadër të Ditës Ndërkombëtare të Shahut, në ambientet e Pallatit të Sportit në Pogradec u zhvillua një Simultane shahu, me pjesëmarrjen e Mjeshtrit të Federatës Ndërkombëtare të Shahut (FIDE), Shpëtim Nazarko.
Ky aktivitet mblodhi dhjetëra dashamirës të sportit të mendjes, të cilët patën mundësinë të ndjekin nga afër mjeshtërinë dhe strategjitë e këtij lojtari të njohur shqiptar. Loja u zhvillua në një atmosferë të qetë, përqendruese dhe frymëzuese, ku pjesëmarrësit, si të rinj ashtu edhe të rritur, përfituan nga një eksperiencë unike dhe sfiduese.
Aktiviteti kishte një karakter edukues dhe promovues, duke synuar të rrisë ndërgjegjësimin dhe interesin për këtë disiplinë intelektuale që po njeh zhvillim të qëndrueshëm në qytetin e Pogradecit.
Kjo veprimtari vjen si pjesë e nismave që synojnë të forcojnë kulturën sportive dhe mendore te brezat e rinj, duke e kthyer shahun në një alternativë të vlefshme për zhvillimin logjik dhe kreativ të mendimit.
