Drithasi i Njësisë Administrative Libonik po bëhet gati të mirëpresë një nga ngjarjet më të dashura të verës. Festa e Bukës së Re, një festë që mbledh rreth vetes banorë, të rinj, të moshuar dhe emigrantë të kthyer për pushime, për të nderuar tokën, punën dhe trashëgiminë kulturore të krahinës.
Eventi do të zhvillohet më 12 gusht, në orën 20:00, në sheshin e fshatit Drithas, ku atmosfera pritet të ndizet nga këngë, valle e shije tradicionale.
I ftuari special i mbrëmjes do të jetë këngëtari i njohur Dule Malindi, i cili me repertorin e tij të pasur popullor do të sjellë emocione të veçanta për publikun. Për të ruajtur dhe promovuar trashëgiminë lokale, Sektori i Trashëgimisë Kulturore pranë Bashkisë Maliq do të sjellë një program të larmishëm me këngë e valle popullore.
Agjencia e Shërbimeve Publike, organizatore e aktivitetit, bën thirrje për pjesëmarrje masive, si një mënyrë për të festuar jetën në komunitet, për të forcuar lidhjet mes brezave dhe për të rikthyer vëmendjen te vlerat e traditës dhe bujqësisë.
Një festë e mbushur me simbole, gëzim dhe bashkim.Festa e Bukës së Re është një ftesë e hapur për të gjithë ata që duan të ndiejnë shpirtin e tokës dhe të kulturës vendase.
