Në kuadër të kontrolleve të vazhdueshme për sigurinë rrugore dhe respektimin e ligjit, specialistët e Sektorit të Qarkullimit Rrugor në Korçë arrestuan në flagrancë shtetasin J. L., 41 vjeç, banues në Korçë, i cili u kap duke drejtuar automjetin në gjendje të dehur.
Po ashtu, Komisariati i Policisë Korçë nisi procedim penal për dy shtetas të tjerë:
- E. F., 42 vjeç, banues në Korçë, pas gjetjes dhe sekuestrimit të një mjeti prerës (thikë) në automjetin e tij;
- K. K., 56 vjeç, banues në Korçë, për dyshimin e zaptimit të një sipërfaqeje toke ndërmjet banesës së tij dhe të fqinjit.
Në një tjetër veprim, specialistët për Hetimin e Krimeve në DVKM Korçë referuan materialet për P. Z., 32 vjeç, E. Ç., 41 vjeç, banues në Elbasan, dhe A. Q., 49 vjeç, banues në Devoll, për kalim të paligjshëm të kufirit shtetëror.
Të gjithë materialet proceduriale janë dërguar në Prokurorinë e Korçës për veprime të mëtejshme ligjore.
Ky operacion tregon angazhimin e policisë për garantimin e sigurisë rrugore, respektimin e pronës private dhe kontrollin e paligjshmërisë në kufi.
