Kryeministri Edi Rama ka pritur në një takim 78-vjeçarin Çelnik Shtupalli, banor i fshatit Homçan në Pogradec, i cili kishte pritur rreth pesë orë për të kërkuar ndërhyrjen e qeverisë për infrastrukturën e zonës së tij.
Takimi u zhvillua pas përfundimit të një mbledhjeje shtatë-orëshe me drejtuesit politikë të qarqeve, pasi i moshuari kishte shprehur më herët publikisht në media dëshirën për të takuar kryeministrin dhe përfaqësuesit vendorë, me qëllim ngritjen e shqetësimit për rrugën.
Kërkesa për rrugën në fshatin Homçan
Pas takimit të zhvilluar, Shtupalli tregoi për bisedën e zhvilluar dhe kërkesën konkrete për infrastrukturën rrugore të fshatit: Prandaj i fola kryeministrit që mata rruga është katër kilometra. E kisha besimin që mund të më takojë sepse unë i kam vajtur edhe herë të tjera dhe ia shtrova përfundimisht këtë problem për të bërë rrugën me asfalt. Kryetari i Bashkisë më ka thënë që do e bëjmë, por unë iu drejtova Edi Ramës.
I moshuari theksoi se kryeministri i kërkoi drejtuesit të bashkisë asfaltimin e aksit: Faleminderit shumë Edi Ramës se i tha Ilirit, t’ja bësh rrugën me asfalt. E përqafova dhe i thashë i gjithë populli të përqafon për të gjithë punën e madhe që ke bërë për Shqipërinë, u shpreh ai.
