Drejtuesi politik i Partisë Socialiste për Qarkun e Korçës, Niko Peleshi, ka mbledhur sot në një ambient privat në Maliq deputetët e këtij qarku, Romina Kuko, Besa Spaho, Ilir Pendavinji, Genti Lakollari dhe Bledi Como, në vazhdën e udhëzimeve të lëna nga kryeministri në takimet e fundit.
Sipas burimeve, drejtuesi politik i PS Korçë që nga viti 2013 u ka kërkuar deputetëve të jenë më aktivë në zonat e tyre elektorale, të qëndrojnë më afër komunitetit dhe të intensifikojnë punën nëpërmjet zyrës së deputetit në Korçë.
Kritikat për praninë në media dhe situata në Maliq
Mësohet se Niko Peleshi ka kritikuar mungesën e aktivizimit të deputetëve në rrjete sociale dhe në media, ndërsa fokus i është dhënë edhe problemeve ende të pazgjidhura që prekin qarkun.
Zhvillimi i këtij takimi pikërisht në Maliq duket se mbart një simbolikë nga ana e tij, në një kohë kur ende nuk ka pasur asnjë reagim zyrtar nga deputetët e PS-së apo nga vetë Peleshi lidhur me propozimin për shkrirjen e Bashkisë Maliq.
