Një banor i moshuar nga Pogradeci ka qëndruar për 5 orë radhazi jashtë rezidencës qeveritare në qytet, ku po zhvillohej mbledhja e Partisë Socialiste me drejtuesit politikë, me qëllim për të takuar dhe falënderuar personalisht kryeministrin Edi Rama dhe kryetarin e bashkisë, Ilir Xhakolli.
I moshuari sqaroi se prania e tij përpara godinës lidhej me mirënjohjen që ndiente pasi pretendonte se pushteti qendror dhe ai vendor i kishin dhënë zgjidhje problematikave të tij personale të ngritura më parë.
Pritja pesëorëshe për një përqafim falënderues
Arsyen e kësaj pritjeje të gjatë i moshuari e tregoi gjatë një interviste për gazetarin Xhensil Shkëmbi të Euronews Albania, ku konfirmoi me bindje se do të qëndronte aty deri në përfundim të takimit vetëm për ta takuar kryeministrin.
I pyetur nga gazetari mbi shkakun e takimit, ai u shpreh se kërkonte të falënderonte drejtuesit për zgjidhjen e shqetësimeve të tij.
“Për problemet që më ka shtruar mua, i kam ndjekur këtu, mi ka zbatuar Iliri. Edhe ta përqafoj atë,” u shpreh ai, duke i referuar kryetarit të bashkisë Ilir Xhakolli për zbatimin e zgjidhjeve.
I pyetur nëse kërkonte diçka tjetër përveç falënderimit, i moshuari përfundoi: “Kur të mbarojë, do ta përqafoj njëherë kështu, me kaq.”
