Shqipëria ka ndaluar porositë e reja për importin e mishit të gjedhit dhe shpendëve nga Brazili, duke zbatuar rregulloret më të fundit të Bashkimit Evropian për shkak të mungesës së garancive mbi përdorimin e antibiotikëve. Vendimi ka hyrë zyrtarisht në fuqi më 3 shtator, duke pezulluar blerjet nga furnizuesi kryesor global i këtyre produkteve në tregun vendas.
Zëvendësministrja e Bujqësisë dhe Zhvillimit Rural, Tana Kika, ka bërë të ditur se ky kufizim nuk do të prekë ngarkesat që janë certifikuar përpara datës së hyrjes në fuqi të masës. Sipas saj, çdo ngarkesë e pajisur me dokumentacion të rregullt përpara këtij afati do të lejohet të futet në vend, pavarësisht kohës kur mbërrin fizikisht në pikën doganore.
Kontrolle rigoroze në pikat kufitare
Për të parandaluar hyrjen e produkteve të paautorizuara, autoritetet kanë njoftuar një regjim të rreptë kontrolli përgjatë kufirit. Kika deklaroi se në pikat e inspektimit kufitar do të kërkohet verifikimi i rreptë i vendorigjinës dhe vlefshmërisë së certifikatës veterinare unike për çdo ngarkesë.
Lidhur me rrezikun e mungesës së produkteve apo rritjes së çmimeve në treg, Ministria e Bujqësisë thekson se prioriteti absolut mbetet siguria ushqimore e konsumatorëve. Përballë boshllëkut të mundshëm, parashikohet një zëvendësim gradual me importe nga vende të tjera që përmbushin plotësisht standardet e kërkuara nga Komisioni Evropian.
Peshën e zë tregu brazilian në Shqipëri
Në më shumë se dy dekada të tregtisë me këtë shtet, janë regjistruar raste periodike të bllokimit të ngarkesave për shkak të pranisë së salmonelës, ku rasti më i fundit u shënua në vitin 2025. Pavarësisht këtyre ndërhyrjeve, Brazili ka ruajtur një peshë të konsiderueshme në tregun vendas.
Gjatë gjashtëmujorit të parë të këtij viti, Shqipëria ka importuar nga Brazili 7,991 tonë mish dhe të brendshme, me një vlerë prej 1.48 miliardë lekësh (afro 16 milionë euro). Këto shifra tregojnë se produktet braziliane kanë mbuluar deri tani gati 35% të totalit të përgjithshëm të importeve të mishit në vend.
