Autoritetet shtetërore në Maqedoninë e Veriut kanë vendosur të ulin çmimin e karburanteve, ndërkohë që në Shqipëri tregu po reflekton rritje të mëtejshme të kostove për konsumatorët. Duke filluar nga sot, nafta (EURODIZEL) në shtetin fqinj do të shitet me 95 denarë/litër ose rreth 1.54 €/litër, ndërsa benzina BS-95 do të tregtohet me 94 denarë/litër ose rreth 1.53 €/litër.
Diferenca e çmimeve me rajonin
Në Maqedoninë e Veriut, nafta ka shënuar një rënie të ndjeshme prej 6,50 denarë për litër. Ndryshe nga vendet e rajonit që po aplikojnë masa lehtësuese për qytetarët, në Shqipëri çmimet kanë pësuar rritje gjatë ditëve të fundit. Sipas përditësimit më të fundit të çmimeve në tregun shqiptar, nafta arriti në 219 lekë/litri, duke shënuar një rritje prej 4 lekësh, ndërsa benzina tregtohet me 198 lekë/litri, me një shtrenjtim prej 7 lekësh.
Kjo situatë vjen pas shkrirjes së Bordit të Transparencës rreth dy muaj më parë, periudhë gjatë së cilës çmimet patën arritur nivele rekord deri në 265 lekë/litri për naftën dhe 243 lekë/litri për benzinën. Kolibri ka raportuar edhe më parë se Shqipëria vijon të mbetet me çmimin më të lartë të naftës në rajon, ndërkohë që qeveria aktualisht është tërhequr nga çdo mekanizëm i drejtpërdrejtë kontrolli, duke lënë të hapur pyetjen për masat mbrojtëse ndaj kostove të larta që rëndojnë mbi qytetarët.
