Një distrikt shkollor në Minnesota të SHBA-së ka nisur përdorimin e platformës inteligjente ChatGPT Edu për të ndihmuar mësuesit në punën e tyre të përditshme, duke vendosur një kufizim të prerë që ndalon përdorimin e inteligjencës artificiale për vlerësimin e nxënësve.
Shkollat e St. Cloud janë të vetmet në këtë shtet që kanë integruar këtë version të krijuar posaçërisht për institucionet arsimore. Interesi i stafit ka qenë i menjëhershëm, ku rreth 200 mësues dhe punonjës, që përbëjnë afërsisht 20% të stafit të distriktit, u regjistruan vetëm pak orë pas aktivizimit të sistemit. Mësuesit do ta përdorin këtë teknologji kryesisht për përgatitjen e mësimeve, përshtatjen e materialeve me kurrikulën dhe kryerjen e detyrave administrative, siç është krijimi i teksteve me nivele të ndryshme vështirësie për nxënësit.
Kufizimet dhe roli i njeriut në vendimmarrje
Megjithatë, drejtuesit e distriktit kanë qenë të prerë se vlerësimi i nxënësve duhet të mbetet ekskluzivisht në dorën e njerëzve. Superintendentja e St. Cloud, Laurie Putnam, deklaroi: “Nuk duhet të bëjë vlerësimin. Kjo është një nga gjërat që i kemi kërkuar stafit tonë, sepse ka disa detyra që u përkasin njerëzve”. Ajo theksoi se inteligjenca artificiale është një mjet ndihmës dhe jo zëvendësues: “Besoj se është këtu për të ndihmuar që jeta e mësuesve tanë të bëhet ndonjëherë pak më e thjeshtë. Por nuk do ta zëvendësojë kurrë një mësues, nuk do ta zëvendësojë kurrë një infermier shkolle, një këshillues apo një drejtor”.
Pjesëmarrja në këtë projekt është tërësisht vullnetare dhe kërkon që punonjësit të kalojnë një trajnim të posaçëm për mbrojtjen e privatësisë së nxënësve, saktësinë e informacionit dhe shmangien e njëanshmërisë. Sipas marrëveshjes, kompania OpenAI nuk lejohet të ndajë të dhënat e shkollave apo t’i përdorë ato për trajnimin e modeleve të saj të ardhshme. Aktualisht, ChatGPT Edu po ofrohet falas për shkollat e St. Cloud, ndërsa mësuesit do të ofrojnë sugjerimet e tyre për përmirësimin e platformës në të ardhmen.
