Procesi i regjistrimeve për vitin e ri akademik ka nisur prej data 26 gusht në Universitetin “Fan S. Noli”, i cili është universiteti publik i Korçës. Sipas të dhënave të deritanishme, numri i regjistrimeve mbetet në nivele të përafërta me vitet e shkuara, megjithëse vihet re një rënie e lehtë e studentëve të regjistruar deri në këtë fazë.
Programet më të kërkuara dhe mbështetja me bursa
Rektori i Universitetit të Korçës, Lorenc Ekonomi, bën me dije se programet më të kërkuara nga të rinjtë vijojnë të jenë Sportet, Infermieria, degët e Fakultetit Ekonomik, si dhe ato të Teknologjisë së Informacionit. Lidhur me këtë ecuri, Ekonomi deklaroi: “Ka nisur faza e parë e regjistrimeve. Degët më të kërkuara janë sported dhe infermieria. Por edhe degët e ekonomisë dhe ato të informatikës kanë interes”.
Për këtë vit akademik, Universiteti “Fan S. Noli” do të disponojë edhe 15 kuota për programet prioritare. Studentët që përfitojnë nga skema e mbështetjes financiare për këto programe do të marrin bursë në masën e përcaktuar përgjatë viteve të studimit.
Degët me mungesë interesi dhe afatet e regjistrimit
Nga ana tjetër, disa programe studimi vijojnë të përballen me mungesë interesi nga ana e maturantëve. Regjistrimet janë thuajse minimale në degë si Gjuha Frënge, Gjuha Shqipe, Gjuhët e Pakicave, si dhe në Matematikë-Fizikë. Disa prej këtyre programeve janë pezulluar edhe gjatë vitit të kaluar për shkak të numrit të pamjaftueshëm të studentëve.
Raundi i parë i regjistrimeve është parashikuar të vijojë deri më 8 shtator, ndërsa të dhënat e grumbulluara deri në këto momente konfirmojnë një rënie të lehtë të numrit të përgjithshëm të studentëve të regjistruar në Universitetin e Korçës.
