Faza e parë e regjistrimeve ka nisur në Universitetin “Fan S. Noli” në Korçë, ku përveç programeve tradicionale si sportet dhe infermieria, këtë vit vërehet një rritje e theksuar e interesit për Fakultetin Ekonomik dhe degët e teknologjisë së informacionit.
Rektori i këtij institucioni, Lorenc Ekonomi, ka bërë me dije se ecuria e përgjithshme e regjistrimeve mbetet në linjë me dy vitet e kaluara. Ai sqaroi se këtë vit janë rritur kuotat në programet prioritare nga 6 në 15, të ndara mes inxhinierisë agronomike, matematikë-fizikës dhe biologji-kimisë. Gjithashtu, universiteti ka çelur degën e re Data Science në dy gjuhë, ndërsa vendimi përfundimtar për aktivizimin e të gjitha programeve do të merret nga Senati pas përfundimit të procesit të regjistrimit.
Zgjerimi i marrëveshjeve ndërkombëtare dhe projektet e reja
Përveç procesit mësimor, Universiteti “Fan S. Noli”, që është universiteti publik i Korçës, po vijon zgjerimin e bashkëpunimeve ndërkombëtare. Për vitin akademik 2026-2027 janë parashikuar 36 projekt-propozime dhe janë nënshkruar 27 marrëveshje të reja partneriteti. Aktualisht institucioni numëron 45 marrëveshje aktive me 15 shtete, si dhe 212 mobilitete hyrëse e dalëse për studentët dhe pedagogët. Po ashtu, po zbatohen disa programe të përbashkëta doktorature, masteri dhe bachelori me universitete në Rumani, Itali, Bullgari dhe me Universitetin Politeknik të Tiranës.
