Mariglen Disha do të jetë qytetari i parë i Librazhdit për 4 vitet ardhshme. Ai ka arritur të fitojë bindshëm zgjedhjet vendore të 14 Majit në këtë qytet dhe tashmë siç thotë edhe vetë ai është me mëngë të përveshura për të vazhduar punën për transformimin dhe zhvillimin e mëtejshëm të Librazhdit.
Në një intervistë për Kolobri.al, Disha shprehet mjaft entuziast për punën që ka planifikuar të kryejë dhe se ku dëshiron ta çojë Librazhdin në 4 vitet në vazhdim.
Kush është Mariglen Disha?
Mariglen Disha ka lindur në Librazhd në një familje me tradita dhe autoktone në qytet. Pasi Disha mbaron studimet para universitare në gjimnazin ‘Ibrahim Muca’ të Librazhdit, ndjek më pas studimet e larta në Universitetin Politeknik të Tiranës, fakulteti i Inxhinierisë së Ndërtimit, ku diplomohet në vitin 2003 si Inxhinier Ndërtimi.
Disha ka shërbyer për disa vite si drejtor i Kadastrës së Korcës e më pas në Elbasan dhe Tiranë, ku ka spikatur më punën e tij në drejtimin e institucioneve. Profesionalizmi dhe shërbimi ndaj qytetarëve pa interes dhe pa i ndarë në të majtë dhe të djathtë kanë karakterizuar punën e Dishës në këto institucione.
Pse e patë të arsyeshme të kandidoni për kryetar të bashkisë Librazhd?
Jam propozuar nga Partia Socialiste, mund të them se ishte surprizues por edhe vlerësim padyshim. E megjithatë, vlerësoj çdo propozim që u bë për mua, duke më njohur kaq mirë në punën time të mëparshme, e duke besuar tek unë për të drejtuar bashkinë e Librazhdit.
Çfarë do të bëjë z. Disha ndryshe nga parardhësit e tij?
Mendoj se Kryebashkiaku Kastriot Gurra ka bërë më të mirën, investimet janë të prekshme, qytetarët e shohin çdo ditë punën e bërë. Mendoj se aq ka mundur të bëjë, por jo se aq ka dashur të bëjë. Ajo që di të them, është se çdo projekt të lënë përgjysmë nga Kryebashkiaku për faktorin kohë, do ta çoj përpara me përgjegjshmëri për të vazhduar ti japim më të mirën Librazhdit.
Cilat janë disa nga projektet strategjike për zhvillimin ekonomik, kulturor dhe turistik të Librazhdit?
Kam një plan zhvillimor ekonomik duke afruar kompani, dhe duke u dhënë më shumë mundësi punësimi qytetarëve të mi. Krahas kësaj projektet kulturore dhe investimi në muzeun etnografik do të jenë në fokusin tim. Turizmi mbetet pika strategjike mund të them ku jo vetëm ka nevojë për investim në infrastrukturën rrugore, por gjithashtu edhe për bujtina për të rritur kapacitetet pritëse. Mendoj se kryefjalë në Librazhd do të jetë turizmi!
E cilësoni veten kryetar terreni apo zyre?
(Qesh)Në fakt njihem si administrator i mirë, për shkak të profilit të punës së mëhershme, por me detyrën e Kryetarit të Bashkisë mendoj se do jetë më së shumti në terren, për të parë çdo punë, çdo investim, dhe për tju përgjigjur çdo qytetari që më ka votëbesuar.
Ku e shohim Librazhdin pas 4 viteve?
Librazhdi do të ecë vetëm përpara (qesh) me punë dhe investime, jam gati për tja nisur nga puna duke përveshur mëngët, dhe duke e bërë Librazhdin model të punësimit, turizmit!
Kolibri.al
