Me një vendim të fshehtë dhe në kundërshtim me statutin, Senati i Universitetit të Korçës ka sanksionuar bashkimin apo shkrirjen e tij me Universitetin e Tiranës. Një prej vatrave të dijes që nga viti i parë i funksionimit të tij në vitin 1971, tashmë rrezikon të kthehet në një filial të Tiranës, pa vendimmarrje.
Rektori Dhimitër Bello u është imponuar anëtarëve të tjerë të Senatit të Universitetit duke përfshirë në mënyrë të fshehtë në pikën e rendit të ditës ‘të tjera’, pikërisht votimin për këtë çështje tejet të rëndësishme dhe që normalisht duhet të zinte vend kryesor në axhendën e mbledhjes së Senatit. Në pabesi dhe pa dhënë mundësinë e përballjes së mendimeve paraprakisht është kërkuar që kjo të votohet në këtë mbledhje.
Me vendimin për tu kthyer në një filial të Universitetit të Tiranës, Univeristi ‘Fan S. Noli’ nuk mundet të ketë pavarësinë për të vendosur për politikat e tij akademike, duke rrezikuar kështu humbjen e dobishmërisë dhe ndikimit në Qarkun e Korçës. Kjo mund të sjellë edhe mbyllje të programeve të specializuara, nismave kërkimore dhe burimeve që janë krijuar posaçërisht për të përfituar komuniteti në nivel lokal.
Përkundër mendimit personal të rektorit se bashkimi me Universitetin e Tiranës do të sjellë më shumë cilësi dhe hapjen e degëve proritare, një vendim i tillë mund të sjellë edhe reduktim të financimeve dhe burimeve që do të ndihmonte në avancimin akademik të stafit, e rrjedhimisht do të sjellë edhe rënie të cilësisë së arsimit.
Universiteti “Fan S. Noli” ka krijuar tashmë traditën e tij dhe vendosja ‘nën ombrellën’ e Universitetit të Tiranës do të zbehë të gjithë atë histori, duke demoralizuar stafin pedagogjik, por edhe të gjithë ata të rinj të rajonit juglindor dhe jo vetëm që e kanë zgjedhur si një mundësi të përshtatshme për të qenë pranë zonave të tyre dhe për të kontribuuar si pjesë e këtij komuniteti të madh.
Me këtë vendim për shkrirjen në 2 fakultete, nga 4 që ka aktualisht në Universitetin “Fan S.Noli”, kostot e arsimimit për studentët do të rëndohen, pasi shumë prej tyre nuk do kenë mundësinë të zgjedhin preferencat e tyre për arsim të lartë në Korçë, por do të duhet të shkojnë në Universitete të tjera.
Ndërsa një pjesë e madhe e stafit të tij rrezikon të mbetet i papunë.Vendimi hileqar i rektorit Dhimitër Bello ka shkaktuar reagime të shumta në radhët e profesoratit, por edhe studentëve, pasi përpara se ai të hidhej në votim do të duhej të ishte konsultuar gjerësisht me grupet e interesit për të reformuar këtë Universitet sipas kërkesave të kohqs dhe jo duke bërë hapa pas.
