Pogradeci vijon të mbetet një destinacion mjaft interesant për fundjavën. Së fundmi, krahas kosovarëve që janë të zakonshëm çdo fundjavë, tashmë janë edhe agjencitë greke që e përfshijnë si pjesë të itinerarit të tyre nëpër Shqipëri dhe drejt Malit të Zi. Grekët shprehen shumë të kënaqur me çfarë shohin dhe gjejnë në Pogradec — liqenin, qetësinë dhe shërbimin.
Disa turistë shprehen se janë ndjerë shumë të kënaqur me këtë qytet.
“Është një qytet i bukur këtu, pranë liqenit, i cili është shumë i pastër. Na pëlqen shumë. Unë e kam shëtitur Shqipërinë dhe tashmë jemi duke bërë tur drejt Tiranës e më pas Malit të Zi. Pogradeci ka një kombinim fantastik mal-liqen dhe gjithashtu të gjithëve ju sugjerova ëmbëlsirën si trileçe — shumë e mirë.”
“Kemi pak që kemi mbërritur, shkuam të shikojmë liqenin dhe konsumuam pak kafe. Më pëlqeu shumë natyra këtu, sidomos e gjelbërta. Dua ta vizitoj më shumë Shqipërinë, të mësoj më shumë për të. Nesër do të vizitojmë vende të tjera, do të shohim një kështjellë dhe më pas do të kthehemi në Greqi.”
“Pogradeci është një qytet i këndshëm, shumë pranë liqenit. Është pjesë e itinerarit që ne ndjekim drejt Malit të Zi dhe gjithmonë ndalojmë këtu pasi qyteti është shumë i bukur.”
Në të gjithë juglindjen e vendit, fundjavat janë të mbushura me vendas dhe të huaj, ndërsa Pogradeci tërheq mjaft vizitorë me Drilonin, Tushemishtin dhe Linin piktoresk.
