Tre automjete janë përfshirë në një aksident rrugor këtë pasdite në aksin Korçë–Symiz, duke shkaktuar plagosjen e tre personave. Të lënduarit janë transportuar menjëherë në Spitalin Rajonal të Korçës dhe ndodhen jashtë rrezikut për jetën.
Sipas ekspertëve të qarkullimit rrugor, aksidenti është shkaktuar nga një manovër e gabuar e njërit prej automjeteve që po udhëtonte nga Korça në drejtim të Pogradecit. Ky mjet ka kaluar në krahun e kundërt të rrugës, duke u përplasur fillimisht me një automjet që vinte nga Pogradeci në drejtim të Maliqit dhe më pas me një mjet tjetër që e ndiqte nga pas.
Autoritetet po vijojnë hetimet për zbardhjen e plotë të rrethanave të ngjarjes, ndërkohë që theksohet se aksi rrugor Kapshticë–Qafë Thanë mbetet një ndër më problematikët për shkak të degëzimeve të shumta, që shpesh kthehen në burim aksidentesh.
