Deputetja e zgjedhur e Partisë Demokratike, Ledina Alolli, ka reaguar me tone të ashpra ndaj aksionit për lirimin e hapësirave publike në qytetin e Korçës, duke e konsideruar këtë një fushatë të organizuar nga qeveria me urdhër të kryeministrit Edi Rama, pa asnjë plan dhe pa asnjë dialog me bizneset e prekura.
“Sot jam këtu para jush për të dënuar me forcën më të madhe veprimet arbitrare të qeverisë Rama, që godasin drejtpërdrejt ekonominë dhe zhvillimin e biznesit korçar,” – u shpreh Alolli.
Sipas saj, dhjetëra biznese të vogla dhe të mesme që kanë operuar për vite me dokumentacion të rregullt dhe kanë paguar detyrimet, janë vendosur përballë ultimatumit për të liruar hapësirat publike brenda disa ditësh, ndryshe do të përballen me ndërhyrje të dhunshme.
“Këto biznese nuk kanë zaptuar, por kanë punuar në përputhje me ligjin dhe me leje të lëshuara nga vetë Bashkia e Korçës. Edi Rama ka urdhëruar shembjen e tyre pa paralajmërim, pa analizë, pa zgjidhje,” – tha ajo.
Alolli akuzoi kryebashkiakun Sotiraq Filo për servilizëm ndaj kryeministrit, duke e quajtur “lodrën e Ramës”, ndërsa theksoi se vetë ai ka qenë firmëtari i lejimeve për përdorimin e hapësirave publike para zgjedhjeve, me tarifa të caktuara sipas sezonit.
“Ka qenë pikërisht Filo që i ka miratuar këto kërkesa, me 10 lekë për metër katror në muajt e ftohtë dhe 19 lekë në muajt e sezonit turistik. Sot, i njëjti njeri që i ka lejuar, i kërcënon me fadromë,” – shtoi Alolli.
Duke vënë në dukje mungesën e një plani për menaxhimin e kësaj situate, deputetja paralajmëroi rrezikun e konflikteve sociale dhe trajtimin e pabarabartë të subjekteve, nëse “miqtë e pushtetit” do të përjashtohen nga goditjet.
“Ky vendim rrezikon të kthehet në nxitës përplasjeje dhe diskriminimi, nëse do të preken vetëm të pambrojturit, ndërsa të pushtetshmit shpëtojnë,” – tha ajo.
Alolli theksoi se nuk është kundër lirimit të hapësirave publike në parim, por kundër mënyrës si po zbatohet ky vendim:
“Lirimi i hapësirave publike duhet të bëhet me një plan të qartë dhe të drejtë për të gjithë. Por kur ndodhet në shërbim të klientelës, kthehet në dhunë institucionale,” – deklaroi ajo.
Në fund të deklaratës së saj, deputetja e PD-së lëshoi një thirrje për bashkim dhe rezistencë nga ana e bizneseve të prekura:
“U bëj thirrje të gjithë bizneseve të bashkohen dhe ta kundërshtojnë me çdo formë këtë vendim. Ne si Partia Demokratike do të jemi krah tyre deri në fund. Diktatura nuk ka brirë – janë pikërisht këto veprime që e tregojnë qartë instalimin e saj,” – përfundoi Ledina Alolli.
