Ambasadori i Bashkimit Evropian në Shqipëri, z. Silvio Gonzato, gjatë vizitës së tij në qytetin e Korçës, ndaloi edhe në Shkollën Profesionale Teknike, ku u njoh nga afër me punimet dhe arritjet e nxënësve të kësaj shkolle.
Nxënësit prezantuan një sërë punimesh të realizuara gjatë procesit mësimor, të cilat janë vlerësuar me çmime në konkurse të ndryshme, duke dëshmuar cilësinë dhe përkushtimin e lartë në arsimin profesional.
Në kuadër të vizitës, ambasadori Gonzato mori pjesë gjithashtu në një takim të organizuar nga UNDP, që u zhvillua në ambientet e Shkollës Profesionale Teknike Korçë. Takimi kishte në fokus bashkëpunimin ndërinstitucional dhe mbështetjen për arsimin profesional në Shqipëri.
Stafi dhe drejtuesit e shkollës shprehën mirënjohjen për vëmendjen dhe vlerësimin që iu kushtua punës së tyre, si dhe për mundësinë për të mirëpritur përfaqësues të Bashkimit Evropian në institucionin e tyre.
Kjo vizitë nënvizon rëndësinë që arsimi profesional ka në zhvillimin e qëndrueshëm dhe integrimin evropian të vendit.
