Pas ngjarjes së fundit të ndodhur në Devoll, ku një 32-vjeçar u mor me forcë nga banesa, u mbajt për disa orë dhe u dhunua fizikisht, Drejtoria e Përgjithshme e Policisë së Shtetit ka ndërmarrë masa të menjëhershme disiplinore ndaj drejtuesve të Policisë në qarkun e Korçës.
Nga analiza e kryer mbi mënyrën e menaxhimit të situatës, është konstatuar se zinxhiri drejtues i Drejtorisë Vendore të Policisë Korçë nuk ka përmbushur detyrimet ligjore dhe nuk ka menaxhuar siç duhet rastin, duke dëmtuar imazhin e Policisë në komunitet.
Për këtë arsye, Drejtori i Përgjithshëm i Policisë së Shtetit, Drejtues Madhor Ilir Proda, ka urdhëruar:
Shkarkimin nga detyra të Drejtorit të Drejtorisë Vendore të Policisë Korçë, Drejtues Erion Ahmeti;
Pezullimin nga detyra të Zëvendësdrejtorit për Hetimin e Krimit në DVP Korçë, Drejtues Hajri Kushe, deri në përfundimin e hetimit disiplinor.
Ndërkohë, Drejtoria e Standardeve Profesionale ka nisur hetim disiplinor ndaj gjithë zinxhirit drejtues të DVP Korçë dhe Komisariatit të Policisë Devoll, për mospërmbushje të detyrave që kanë sjellë pasoja të rënda.
Deri në përfundim të konkursit për drejtor vendor, është caktuar përkohësisht në krye të Drejtorisë Vendore të Policisë Korçë, Drejtues Islor Islami, i cili më parë mbante detyrën e Drejtorit të Drejtorisë Vendore për Kufirin dhe Migracionin Kukës.
Policia e Shtetit thekson se do të vazhdojë të analizojë me përgjegjësi çdo rast të mosveprimit profesional, duke marrë masa të rrepta në përputhje me ligjin dhe rregulloren e saj.
