Policia e Korçës ka ndërhyrë në dy raste të veçanta të dhunës, duke arrestuar dhe proceduar penalisht dy shtetas.
Specialistët për Hetimin e Krimeve në Komisariatin e Policisë Korçë arrestuan në flagrancë shtetasin M. K., 44 vjeç, banues në Korçë, i cili dyshohet se ka ushtruar dhunë fizike ndaj bashkëshortes së tij. Viktima është pajisur me urdhër mbrojtjeje, ndërsa gjatë shoqërimit në komisariat, 44-vjeçari ka kundërshtuar me forcë punonjësit e Policisë.
Ndërkohë, në Maliq, nisi procedimi penal për shtetasin K. M., 30 vjeç, banues në këtë qytet, i cili dyshohet se për motive të dobëta ka goditur me send të fortë një 38-vjeçar, duke i shkaktuar lëndime.
Materialet në të dyja rastet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme procedurale.
