Drejtoria Vendore e Policisë Korçë ka raportuar një sërë ngjarjesh të ndodhura në territorin e saj në 24 orët e fundit, që kanë sjellë arrestime dhe procedime penale për vepra të ndryshme penale.
Specialistët e Sektorit të Qarkullimit Rrugor bënë arrestimin në flagrancë të shtetasit A. M., 55 vjeç, banues në Korçë, pasi u kap duke drejtuar automjetin në gjendje të dehur. Po ashtu, në pranga ra edhe E. A., 26 vjeç, banues në Plasë, i cili drejtonte një motomjet pa leje drejtimi.
Ndërkohë, në Pogradec, Specialistët për Hetimin e Krimeve të Komisariatit të Policisë referuan materialet në Prokurori dhe nisën procedimi penal për dy persona. V. O., 56 vjeçe, dyshohet se ka ushtruar dhunë ndaj vjehrrës së saj, ndërsa D. D., 43 vjeç, akuzohet se ka ushtruar dhunë ndaj motrës së tij.
Në një tjetër ngjarje, më datë 09.07.2025, në fshatin Klocë të Maliqit, dyshohet se një shkëndijë elektrike në një kabllo shkaktoi zjarr në një sipërfaqe toke në pronësi të shtetasit L. Gj., 70 vjeç. Si pasojë e flakëve janë djegur rreth 30 pemë frutore, duke shkaktuar dëme materiale.
Materialet procedurale mbi këto raste i janë referuar Prokurorisë për veprime të mëtejshme.
