Drejtoria Vendore e Policisë Korçë ka bërë publik bilancin e 24 orëve të fundit, ku janë regjistruar disa raste shkeljesh të ligjit, që kanë sjellë arrestime, procedime penale dhe referim materialesh në Prokurori. Në Korçë u arrestua një 19-vjeçar i cili u kap duke drejtuar automjetin pa leje drejtimi, si dhe një 52-vjeçar që drejtonte mjetin në gjendje të dehur. Po në Korçë u arrestua një 66-vjeçar pasi dyshohet se ushtroi dhunë fizike ndaj djalit të tij, ndërsa tre shtetas të tjerë dhe dy të mitur u proceduan penalisht për dhunë pas konflikteve për motive të dobëta.
Ndërkohë, në Maliq u arrestua një 56-vjeçar dhe u procedua në gjendje të lirë një 73-vjeçare, pas dyshimeve për dhunë fizike në konflikt pronësie, si dhe u procedua penalisht një 59-vjeçar nga fshati Zëmblak për veprime të turpshme ndaj një të miture. Materialet i janë referuar Prokurorisë së Korçës për veprime të mëtejshme ligjore.
