Drejtoria Vendore për Kufirin dhe Migracionin Korçë, në bashkëpunim me Policinë Kufitare të Kapshticës dhe nën drejtimin e Prokurorisë së Korçës, ka finalizuar me sukses operacionin policor të koduar “Pagesa”, i cili kishte në fokus goditjen e veprimtarisë kriminale të dhënies ndihmë për kalim të paligjshëm të kufirit.
Në kuadër të këtij operacioni u arrestua në flagrancë shtetasi maroken O. Ch., 24 vjeç, i cili u kap në fshatin Qytezë, Devoll, teksa shoqëronte dy shtetas të tjerë marokenë, me qëllim kalimin e paligjshëm të kufirit.
Nga hetimet paraprake dyshohet se i riu, në bashkëpunim me persona të tjerë marokenë, kishte ngritur një rrjet që ndihmonte emigrantët nga vende të treta të hynin ilegalisht në territorin shqiptar nga Greqia, për t’i transportuar më pas drejt vendeve të Bashkimit Europian, nëpërmjet Malit të Zi, kundrejt pagesave të konsiderueshme.
Policia thekson se hetimet vijojnë për dokumentimin e plotë të kësaj veprimtarie kriminale dhe për identifikimin e personave të tjerë të përfshirë në këtë rrjet.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme ligjore.
