Tiranë – Përballë pjesëmarrjes së ulët në edicionet e mëparshme të Sondazhit Kombëtar të Studentëve, Agjencia e Sigurimit të Cilësisë në Arsimin e Lartë (ASCAL) ka ndërmarrë këtë vit hapa konkretë për të ndërgjegjësuar studentët dhe për të rritur angazhimin e tyre.
Drejtoresha e ASCAL-it, Dr. Xhiliola Bixheku, bëri të ditur se procesi i këtij viti ka nisur më herët dhe po shoqërohet me takime konsultuese në universitete të ndryshme të vendit, me qëllim rritjen e ndërveprimit me studentët.
“Sondazhi është një mekanizëm real për të dëgjuar zërin e studentëve dhe për të sjellë përmirësime konkrete në sistemin universitar,” theksoi Bixheku, duke i bërë thirrje të gjithë studentëve që ta shfrytëzojnë këtë mundësi për të ndarë mendimet dhe përvojat e tyre lidhur me arsimin e lartë në Shqipëri.
Sondazhi Kombëtar i Studentëve 2025 do të zhvillohet nga data 21 prill deri më 23 maj, dhe përfshirja e gjerë e studentëve konsiderohet thelbësore për të ndikuar në zhvillimet e ardhshme akademike në vend.
