Në lagjen e re të fshatit Libonik, Bashkia e Maliqit ka përfunduar asfaltimin e rrugës kryesore në një gjatësi prej 350 metrash, duke përmbushur një nga kërkesat më të hershme të banorëve të zonës. Rruga e vjetër, e amortizuar prej vitesh, krijonte vështirësi në qarkullim, veçanërisht gjatë periudhave me reshje, për shkak të gropave dhe baltës së shumtë.
Ndërhyrja është kryer me fondet e Bashkisë Maliq dhe ka sjellë një përmirësim të ndjeshëm të infrastrukturës në këtë zonë, duke e transformuar pamjen e lagjes dhe lehtësuar ndjeshëm jetën e përditshme të komunitetit.
Sipas administratores së njësisë Libonik, Burbuqe Beshiri, Bashkia e Maliqit po vijon me ndërhyrje të ngjashme në disa fshatra të tjera të njësive administrative, me qëllim përmirësimin e rrugëve rurale dhe ofrimin e kushteve më të mira për banorët në çdo cep të territorit.
