Besa Spaho, kandidatja e Partisë Socialiste për qarkun e Korçës, po zhvillon një nga fushatat më intensive dhe më të afërta me qytetarët që janë parë ndonjëherë në këtë zonë. Ajo ka zgjedhur të mos qëndrojë në zyrë, por të trokasë derë më derë në të gjashtë qytetet e juglindjes, duke u takuar me njerëzit, duke i dëgjuar dhe duke marrë mbi supe zërin dhe hallet e tyre.
E lindur dhe rritur në Korçë, Besa ka pasur një karrierë të gjatë në administratën publike, me pozicione kyçe në Agjencinë e Pronave në Tiranë dhe Korçë, e së fundmi si nënkryetare e Bashkisë së Korçës. Ajo është dëshmuar si një grua që nuk flet thjesht për zgjidhje, por i jep ato në kohë dhe me përgjegjësi.
Besa Spaho është gjetja unike e Partisë Socialiste për këto zgjedhje. Jo vetëm për përvojën e saj, por sepse është një figurë popullore, që gëzon respektin e të gjithëve – socialistë, demokratë e të pavendosur. Ajo di si të bëjë fushatë, jo me premtime boshe, por me një mënyrë të natyrshme dhe njerëzore që fiton zemrat e qytetarëve.
Në çdo takim, qytetarët nuk ngurrojnë të tregojnë se e duan Besën, sepse ajo ka qenë gjithmonë pranë tyre. Ata e shohin si njeriun që mbaron punë, që nuk pret urdhra nga lart për të ndihmuar dikë në nevojë, por që ka vepruar me shpirtin e shërbimit dhe përkushtimit.
Gjatë një takimi të fundit në lagjen nr. 17 të Korçës, Spaho theksoi se nuk do të ndryshojë as pas zgjedhjeve. “Unë do të jem e njëjta, me të njëjtin karakter dhe të njëjtën fytyrë edhe në Parlament”, u shpreh ajo, duke siguruar qytetarët se do të mbetet pranë tyre dhe kauzave të tyre të përditshme.
Për Spahon, angazhimi politik nuk është fushatë njëmujore, por një detyrë e përhershme ndaj njerëzve. Ajo e sheh Kuvendin si një zgjatim të rrugëve, lagjeve dhe shtëpive të njerëzve që ka vizituar, jo si një shkëputje nga realiteti.
Në një klimë politike ku shumëkush vjen e ikën pa lënë gjurmë, Besa Spaho po dëshmohet si një zë i rrallë dhe i sinqertë në juglindje – një grua që nuk kërkon votën, por besimin, dhe që është gati ta shpërblejë me punë të ndershme dhe me përfaqësim dinjitoz në Parlament.
