Bismark Ngissah është kthyer në një nga emrat më të komentuar pas paraqitjeve mbresëlënëse me Vllazninë në ndeshjet europiane. Sulmuesi ganez, i huazuar nga Skënderbeu vetëm për përballjet e Conference League, ka treguar se është në formë të shkëlqyer, duke u bërë vendimtar në repartin ofensiv të kuqebluve.
Zyrtarisht, pas përfundimit të aventurës europiane të Vllaznisë, Bismark pritet të rikthehet në Korçë, te Skënderbeu, ku ka kontratë aktive. Por duke parë ecurinë e tij të deritanishme, rikthimi i tij në Superligë me fanellën bardhekuqe është vënë në pikëpyetje. Forma e mirë dhe profili i tij si sulmues i ri dhe fizikisht i fortë, ka ngjallur interesin e disa klubeve jashtë Shqipërisë.
Nëse vijon në këtë ritëm, Bismark mund të jetë një nga “asetet e arta” të merkatos së verës, dhe Skënderbeu mund ta shfrytëzojë si një mundësi për transferim të bujshëm. Për momentin, ai është një armë e fuqishme për Vllazninë në Europë, por e ardhmja e tij mbetet e hapur dhe gjithçka mund të ndryshojë në javët në vijim.
