Sektori i blegtorisë, një nga shtyllat kryesore të ekonomisë në bashkinë Maliq, ka njohur zhvillim të ndjeshëm vitet e fundit, i reflektuar në shtimin e numrit të krerëve të mbarështuar dhe në përmirësimin e kushteve të fermave.
Drejtori i Bujqësisë dhe Mbrojtjes së Konsumatorit në Bashkinë Maliq, Arben Dulellari, thotë se fermerët që i janë përkushtuar këtij sektori po sigurojnë të ardhura të qëndrueshme, të ndikuara nga dy faktorë kryesorë: rritja e investimeve dhe modernizimi i fermave blegtorale.
“Përveç rritjes së prodhimtarisë, është rritur ndjeshëm edhe cilësia e produkteve të tyre,” thekson Dulellari.
Qarku i Korçës është tashmë një zonë e rëndësishme blegtorale, ku funksionojnë mbi 180 ferma që mbarështojnë mbi 10 krerë gjedh për prodhim qumështi dhe mishi. Ndërkohë, për bagëtitë e imta, janë mbi 200 ferma që mbarështojnë mbi 100 krerë kafshë, duke e kthyer këtë sektor në një burim të qëndrueshëm zhvillimi rural.
