Moti i keq i shoqëruar me erë dhe reshje dëbore ka shkaktuar problematika në disa zona të thella, përveç vështirësisë së lëvizjes në rrugët rurale për shkak të pranisë së dëborës, ka fshatra të tërë pa energji.
Sipas të dhënave më të fundit raportohet se 5 fshatra të njësisë Dardhas në Pogradec të cilët furnizohen nga fidri i Maliqit kanë mbetur pa energji elektrike. Duket se era dhe dëbora kanë shkaktuar këputje të përcjellsave elektrikë.
Nga ana tjetër probleme ka edhe në disa fshatra të Maliqit në njësinë administrative Moglicë ku energjia mungon të paktën prej orës 17 të kësaj pasditeje.
Kjo nuk është hera e parë që shkaktohet një situatë e tillë, pasi këto zona kanë një rrjet të vjetër shtyllash e përcjellsash të cilët vazhdimisht këputen si pasojë e reshjeve dhe amortizimit të tepërt.
