Dejvi Hoxha është i riu nga qyteti i Korçës i cili kërkon një vend në 140-vendshin e shenjtë të parlamentit shqiptar.
Dejvi është një nga ata të rinjtë të cilin e gjen pothuajse kudo në Korçë, në aktivitete sociale, aktivitete bamirësie, në aktivitete politike, aty ku ka vend për vendimmarrje.
Dejvi Hoxha ka aplikuar në platformën deputetiqëduam.al me dëshirën e madhe për të qenë zëri i të rinjve korçarë dhe jo vetëm, për të qenë i riu i cili do të përfaqësojë bashkëmoshatarët e vet, si një nga njerëzit që i njeh mirë problematikat dhe kërkesat e tyre.
Kjo është ajo çka ai ka shprehur në aplikimin e tij;
Ne te rinjte, vendimet më të mëdha i marrim shpesh mbi një filxhan kafeje, duke diskutuar problemet tona në tryeza të vogla. Ka ardhur koha që të përveshim mëngët dhe të punojmë për një Shqipëri më të drejtë dhe të zhvilluar.
Unë jam Dejvi Hoxha, 26 vjeç dhe kam mbaruar studimet per menaxhim dhe finance. Kam nisur të angazhohem që në moshë të re, duke kuptuar rëndësinë e kontributit personal. Në moshën 19-vjeçare u bëra anëtari më i ri i Këshillit Bashkiak të Korçës, dhe tani, si president i një klubi të rinjsh, e di mirë se sa potencial dhe dëshirë ka rinia jonë për të ndërtuar një të ardhme më të mirë.
Nuk dua të flas si politikan, por si një qytetar që i njeh vështirësitë dhe shpresat e këtij vendi. Prej shumë kohësh kemi dëgjuar të njëjtat premtime të përsëritura, por ajo që na mungon është një lidhje e vërtetë, ku të gjithë ne së bashku, të vendosim për të ardhmen e përbashkët. Përvoja ime e hershme në zyrën e sigurimeve të prindërve dhe më vonë në media e administratë më ka mësuar se puna e palodhur dhe përkushtimi për komunitetin janë veprat që kërkojnë mund dhe kurajo.
Në këtë rrugëtim kam kuptuar se më e rëndësishme se të bëhesh deputet është të jesh një qytetar i mirë, që nuk dorëzohet përballë vështirësive. Kjo është sfida ime: të jem një zë për ata që besojnë tek një Shqipëri më e drejtë dhe një të ardhme më të mirë për të gjithë. Unë besoj tek Shqipëria 2030, si pjesë e Bashkimit Europian, ku rinia mund të ndërtojë të ardhmen në vendin e saj dhe se Shqiperia mund te ec para vetem me politika te majta.
Korça, që për dekada ka qenë shembull për gjithë vendin, meriton përkushtim dhe përparim. Kjo është sfida jonë e përbashkët: të ndërtojmë një të ardhme ku çdo shqiptar ndihet i sigurt, ku çdo i ri ndihet i vlerësuar dhe ku çdo familje ka mundësi të jetojë me dinjitet.
