Aksi Lin Pogradec është një nga rrugët më panoramike në Shqipërri dhe rajon për nga pamja që të ofron gjatë kohës që e përshkruan atë me makinë apo edhe me biçikletë. Krahas investimit të kësaj rruge dhe ndriçimit rrugor natë, një element interesant në hapjen e saj ishte edhe mbjellja e qindra fidanëve të llojit pishë, si një element plotësues për gjithçka çfarë ofron ky aks rrugor. Mirpo kur nuk kanë kaluar shumë vite nga përfundimi i investimit, pishat po dëmtohen masivisht. Një pjesë e tyre janë tharë si pasojë e mungesës së përkujdesjes ndërsa një pjesë e madhe janë rrëzuar apo mënjanuar si pasojë e erës së fortë që fryn gjatë periudhës së vjeshtës dhe dimrit.E teksa një situatë e tillë konstatohet përgjatë të gjithë këtij aksi, vihet re se vemendja për tu kujdesur për to është e pakët.Mbetet e paqartë se kush dhe si duhet të ndërhyjë, pasi ky aks rrugor është i dhënë me kontratë mirëmbajtje tek firma 2T e cila kujdeset për rrugën dhe skarpatat e saj, por se nuk po kujdeset për fidanët e pishës, as për vaditje dhe as për drejtim në zonat ku ato kanë rënë.Disa kohë më parë pati një ndërhyrje nga sektori i gjelbërimit pranë bashkisë Pogradec, por burimet bëjnë me dije se fakti që rruga është në juridiksionin e ARRSH dhe mirëmbajtje nga 2T duhet që kjo e fundit të kryejë mirëmbajtjen edhe për pemët.Është e paqartë se sa ka qenë fondi i shpenzuar për blerjen e qindra rrënjve pishë në një gjatësi gati 20 km të mbjella, por ajo që është tepër e qartë mbetet fakti që ato po dëmtohen masivisht duke shkuar dëm i gjithë investimi.
