Foto e Ismail Qemalit me emërtimin në anën e pasme “Berat Mebusu Ismali Kemal Bey”, në shqip “Deputeti i Beratit Ismail Qemal Bej”. Nga informacioni i fotos, ajo është bërë në studion e Frères Abdullah në Stamboll, e cila u krijua nga Vëllezërit Viçen, Hovsep dhe Kevork Abdullahyan.
Në vitin 1858 ata hapën studion e tyre fotografike në lagjen Bejazit të Stambollit, për t’u shpërngulur më pas, më 1867 në lagjen evropiane, Pera.
Në gjysmën e dytë të shek. XIX, u kthye në studion më të njohur të Perandorisë Osmane dhe në vitin 1863 Sulltan Abdylazizi i shpalli vëllezërit Abdullah fotografë të Oborrit Perandorak duke u dhënë titullin “Artistë të Shquar të Qytetit”.
Këtë titull fotografët e mbajtën deri më 1899, kur mbyllën veprimtarinë e tyre. Në këtë studio kanë realizuar foto Pashko Vasa, Jashar bej Shkupi, shqiptarët e Gardës së Sulltanit etj.
Arkivi i Shoqërisë Historike Turke.
