Në pikë të diellit, mesditën dhe mesmuajin e këtij korriku, kur njerëzia duket se nuk gjejnë derman nga vala e të nxehtit disi të pazakontë në Korçë, ai shpërndan pako postare.
Ndalet një çast sa të pijë një kafe dhe me doza humori tregon maja-maja epidode të jetës së tij si postier veteran i Korçës.
Theodhoraq Pano është gati 70 vjeç, dhe mbi shtatin e tij të pakët por tip sportivi duket se nuk peshon mosha pasi vazhdon të jetë aktiv në një profesion që e ka ushtruar prej të paktën tre dekadash.
Në Korçë njihet gjërësisht si ‘Dhori postieri’ një ‘nofkë’ kjo që e ka marrë si lajmës.
I rregjur në profesionin e postierit është gati të sfifojë këdo për emrin e çdo rruge të Korçës që e ka përshkuar vite e vite me rradhë. Në vapë si sot apo në shi, në dimër, ditën e natën. Dhori Postieri nuk heq kollaj dorë nga misioni k tij i shpërndarësit të porosive.
‘Unë jam postieri bio i Korçës‘ shprehet me shakanë e tij karakteristike Dhori. Ai kujton se ka ndarë nëpër familjet korçare afro 500 llotari amerikane të fituara nga banorë të këtij qyteti. Siç i pëlqen të tregojë se ka ndarë edhe revistat ‘Fatosi’ e ‘Pionieri’ apo dy herë nga 400 kopje gazetën ‘Zëri i Popullit’ atëbotë kur u nda nga jeta tokësore Enver Hoxha.
Dhori postieri ka shumë për treguar nga profesioni i tij dhe të le një takim të ardhëshëm për të tjera ndodhi që ka përjetuar se shpejton të çojë diku një pako postare.
