Nëna e Ilirjan Selmanit, 31-vjeçarit të dyshuar për vrasjen e ish-bashkëjetueses së tij në Pogradec, ka reaguar me lot në sy, duke mohuar kategorikisht përfshirjen e të birit në këtë ngjarje të rëndë.
E kontaktuar jashtë kamerave, Sanie Selman ka hedhur poshtë akuzat ndaj të birit, duke e përshkruar atë si një djalë të qetë, të dashur dhe të paqartë për aktin që i atribuohet.
“Iliri nuk është njeri i dhunshëm, ai nuk ka bërë asnjëherë sherre as në shtëpi, as me fqinjët. Pyetni në lagje dhe do ju thonë çfarë djali është. Ai nuk i bënte keq askujt, nuk vriste as mizë,” është shprehur nëna e të dyshuarit.
Ajo tregon se, pavarësisht mospëlqimit të saj për marrëdhënien e të birit me viktimën, një grua më e madhe në moshë se ai, nuk kishte ndërhyrë asnjëherë për t’i ndarë: “E kishte pranuar siç ishte dhe nuk e pengova kurrë.”
E tronditur, nëna e të riut denoncon se lajmet dhe deklaratat që kanë qarkulluar në media nuk pasqyrojnë të vërtetën dhe thekson se familja nuk është informuar nga autoritetet: “Ngjarjen e mësuam nga mediat, më pas erdhën 15 policë në shtëpi dhe gati ma shtrinë djalin përdhe.”
Ajo tregon se Iliri vuan nga sëmundje kronike në zemër dhe është nën trajtim të vazhdueshëm mjekësor, madje përfiton dhe kemp për gjendjen e tij shëndetësore.
Sanie Selman i bën thirrje organeve të drejtësisë të hetojnë me kujdes dhe të zbardhin të vërtetën: “Nuk dua që djali im të bëhet fajtor për diçka që nuk ka bërë. Nuk ishte vetëm me të. Policia të hetojë siç duhet.”
Deklarata e saj vjen në një kohë kur ngjarja ka tronditur opinionin publik, ndërsa hetimet për krimin e ndodhur në Pogradec vijojnë.
