Për herë të parë në Shqipëri: Spërkatja e kulturave bujqësore me dron në Maliq
Në fshatin Pojan të bashkisë së Maliqit, për herë të parë në vendin tonë, është aplikuar spërkatja e kulturave bujqësore me dron. Kjo teknologji është përdorur në një sipërfaqe prej 20 hektarësh të mbjella me patate, duke shënuar një hap të rëndësishëm drejt modernizimit të bujqësisë shqiptare.
Nevion Telha, specialist pranë Qendrës së Transferimit të Teknologjive Bujqësore, theksoi se spërkatja me dron është shumë herë më efiçente se metodat tradicionale me mjete bujqësore. “Kjo teknologji redukton ndjeshëm kohën dhe koston e spërkatjes, duke ofruar një mbulim më të saktë dhe të njëtrajtshëm të kulturave,” u shpreh Telha.
Mikel Plasa, një nga fermerët superpotencialë të njësisë administrative Pojan, mirëpriti këtë inovacion. Ai theksoi se spërkatja tradicionale ka kosto më të lartë dhe shtoi se nëse kjo metodë rezulton efiçente, do të ulë ndjeshëm koston e prodhimit për të gjithë fermerët.
Fusha e Maliqit, e cila shtrihet në mbi 12 mijë hektarë, kultivon grurë, misër, patate dhe kultura të tjera prashitëse. Specialistët besojnë se përdorimi i dronëve për spërkatje mund të shtrihet edhe në këto kultura, duke sjellë përfitime të mëdha për bujqësinë e rajonit.
