Në krahinën e Mokrës u zhvillua edicioni i gjashtë i festivalit “Mokra n’Fest”, një ngjarje që ka për qëllim promovimin e natyrës, kulturës dhe traditave të kësaj zone. Festa, e organizuar pranë “Urës së Gurit”, monument kulture i kategorisë së parë dhe pjesë e rrugës së lashtë “Egnatia”, mblodhi mbi 4 mijë pjesëmarrës, të cilët shijuan jo vetëm bukurinë e peizazhit, por edhe shijen e gatimeve tradicionale të mishit, brumit dhe prodhimeve të tokës.
Në fjalën e tij, Drejtori i Turizmit dhe Trashëgimisë Kulturore në Bashkinë Pogradec, Ledjan Zeqollari, theksoi se Mokra dhe banorët e saj njihen për mikpritjen dhe zakonet e veçanta, ku dollia me rakinë e kumbullës është pjesë e pandarë e festës. Atmosfera u gjallërua nga muzika popullore, vallet tradicionale dhe performancat artistike, mes tyre edhe sfidat në ajër të Fiona Rushitit, ndërsa nata u mbyll me kampingun e dhjetëra të rinjve e të apasionuarve pas natyrës.
Vit pas viti “Mokra n’Fest” po kthehet në një pikëtakim të rëndësishëm për vizitorë vendas dhe të huaj nga jugu në veri të vendit, duke promovuar historinë, zakonet dhe mikpritjen e kësaj krahine të veçantë.
