Deputeti i Partisë Demokratike dhe një nga figurat më të njohura të së djathtës në Shqipëri, Edmond Spaho, ka shpallur largimin nga politika aktive pas më shumë se tri dekadash në shërbim të publikut.
Përmes një deklarate publike pas zgjedhjeve të 11 majit, Spaho shprehu tronditjen e tij për rezultatin e këtyre zgjedhjeve, duke theksuar se ky ishte kapitulli i fundit i angazhimit të tij parlamentar:
“Jam i shokuar me rezultatin e zgjedhjeve të 11 majit! Këto zgjedhje ishin të fundit të karrierës sime aktive në Parlament.”
Ai ka ndarë falënderime të sinqerta për familjen, mbështetësit dhe qytetarët që e kanë votuar dhe besuar përgjatë 35 viteve.
“Dëshiroj të falënderoj pafundësisht familjen time për sakrificat e mëdha që ka bërë gjatë gjithë këtyre viteve për të më krijuar mundësinë të ndiqja pasionin tim.”
Në mënyrë të veçantë, Spaho u shpreh mirënjohës për strukturat e Partisë Demokratike në Maliq dhe në të gjithë qarkun e Korçës, për mbështetjen e vazhdueshme që i kanë dhënë:
“Pa ata nuk do kisha arritur asgjë në politikë.”
Ai u kërkoi ndjesë qytetarëve për gjithçka që nuk ka mundur të bëjë në këto vite përfaqësimi, ndërsa i bëri një thirrje të fortë Partisë Demokratike për të reflektuar dhe për t’u ringritur:
“I uroj Partisë Demokratike të gjejë forcën për të kaluar gjendjen e rëndë ku ndodhet dhe të arrijë të rikthehet në shpresë për Shqipërinë.”
Deklarata e tij përmbyllet me tone të larta mirënjohjeje dhe dinjiteti, duke vulosur përfundimin e një karriere të gjatë dhe të angazhuar në jetën politike shqiptare.
Reagimi i tij në facebook;
Te nderuar miq,
Jam i shokur me rezultatin e zgjedhjeve te 11 Majit!
Keto zgjedhje ishin te fundit te karrieres sime aktive ne Parlament.
Deshiroj te falenderoj pafundesisht familjen time per sakrificat e medha qe ka bere gjate 35 viteve per te me krijuar mundesine te ndiqja pasionin tim.
Falenderoj antaret dhe simpatizantet e Deges se PD Maliq dhe te Qarkut Korce per mbeshtetjen e vazhdueshme qe me kane dhene. Pa ata nuk do kisha arritur asgje ne politike.
Deshiroj te falenderoj me shume mirenjohje qytetaret qe me besuan dhe votuan gjate 35 viteve dhe tju kerkoj ndjese qe nuk munda te bej edhe me shume per ta.
I uroj Partise Demokratike te gjeje forcen per te kaluar gjendjen e rende ku ndodhet dhe te arrije te rikthehet ne shprese per Shqiperine.
Me shume mirenjohje,
Edmond Spaho
