Eduard Duro përballet me akuzën për “shpërdorim detyre” në SPAK
Dy javë pasi u mor i pandehur nga Prokuroria e Posaçme Antikorrupsion (SPAK), kryebashkiaku socialist i Devollit, Eduard Duro, është paraqitur sërish në SPAK, i shoqëruar nga avokati i tij. Duro përballet me akuzën për “shpërdorim detyre”, pasi licencoi një biznes karburanti që ishte ndërtuar pa leje. Akuza erdhi pas një kallëzimi të depozituar nga një subjekt tjetër në prokurorinë speciale.
Në një reagim zyrtar, Duro deklaroi se sektori i tatim-taksave ka dhënë autorizim për shitje karburanti në përputhje me ligjin dhe se ai ka firmosur dokumentacionin sipas detyrimeve të kryetarit të bashkisë. Ai shtoi se nuk bëhet fjalë për shpërdorim detyre, por për përmbushjen e detyrave në mënyrë të ligjshme.
Deklarata e Duro-s: “Sektori i tatim-taksave ka dhënë autorizim për shitje karburanti në përputhje me ligjin. Shtetasit J.K dhe M.K kanë bërë denoncim se ky dokument nuk duhej dhënë subjektit ‘Genci Petrol’. Kam firmosur çdo gjë siç e kërkon ligji dhe nuk bëhet fjalë për shpërdorim detyre por për përmbushjen e detyrave të një kryetari bashkie.”
