Një ngjarje e pazakontë ka ndodhur mbrëmjen e sotme në qytetin e Korçës, ku një person ende i paidentifikuar ka hyrë me forcë në ambientet e një banke të nivelit të dytë, duke transmetuar gjithçka live në platformën TikTok.
Ngjarja ka ndodhur rreth orës 22:04 në lagjen nr. 3 të qytetit. Autori ka shtyrë me forcë derën e jashtme të bankës dhe ka hyrë brenda, ndërkohë që po transmetonte veprimet e tij për ndjekësit e tij në TikTok.
Pas aktivizimit të alarmit, shërbimet e Policisë mbërritën menjëherë në vendngjarje, duke bërë që autori të largohej me shpejtësi pa marrë asnjë send nga ambientet e bankës. Policia ka nisur ndjekjen dhe ka rrethuar zonën ku dyshohet se ai është fshehur.
Grupi hetimor, nën drejtimin e Prokurorisë, po punon për të identifikuar autorin dhe për të hetuar nëse transmetimi live ka ndihmuar në zbardhjen e ngjarjes. Ngjarja ka tërhequr vëmendje të madhe për shkak të përdorimit të rrjeteve sociale gjatë kryerjes së aktit.
