Në kuadër të festave të fundvitit, pranë Institucionit të Ekzekutimit të Vendimeve Penale (IEVP) Korçë u zhvillua një aktivitet social, kulturor dhe festiv, i cili u shndërrua në një ditë të mbushur me emocione të forta, mesazhe humanizmi dhe shprese.
Ky aktivitet i veçantë solli pranë njëri-tjetrit fëmijët dhe prindërit e tyre, duke krijuar një atmosferë të rrallë dhe thellësisht prekëse. Përqafimet plot mall, buzëqeshjet e sinqerta dhe lotët e fshehur dëshmuan se lidhja prind–fëmijë mbetet e pathyeshme, pavarësisht rrethanave.
Me mbështetjen dhe përkushtimin e stafit social, fëmijët përgatitën kartolina urimi për baballarët e tyre, ndërsa prindërit u përgjigjën me mesazhe të mbushura me dashuri, reflektim, pendesë dhe shpresë për të ardhmen. Recitimet dhe urimet e fëmijëve krijuan momente të ngarkuara emocionalisht, duke prekur zemrat e të pranishmëve dhe duke lënë gjurmë të forta ndjesore.
Atmosfera festive u pasurua edhe më shumë nga tingujt e muzikës tradicionale, të interpretuar nga Sazet e Kolonjës, të cilat shoqëruan aktivitetin me këngë plot ndjenjë, mall dhe kujtime, duke e kthyer këtë ditë në një festë të vërtetë shpirti.
Në përfundim të aktivitetit, fëmijëve iu shpërndanë dhurata, të siguruara falë bashkëpunimit me institucionet partnere, duke sjellë gëzim të sinqertë dhe buzëqeshje që ndriçuan ambientin.
Mesazhi përmbyllës i përcjellë nga titullari i institucionit, Lorent Nake, ishte i qartë dhe i fuqishëm: dashuria e një prindi nuk shuhet kurrë, ndërsa një përqafim, një fjalë e thënë me zemër dhe një buzëqeshje fëmije kanë fuqinë të rikthejnë shpresën, të shërojnë plagë dhe të vendosin humanizmin mbi gjithçka.
Ky aktivitet u zhvillua në bashkëpunim me Drejtorinë e Përgjithshme të Burgjeve, duke përcjellë një mesazh të fortë shoqëror për rëndësinë e familjes, empatisë dhe vlerave njerëzore, veçanërisht në prag të festave të fundvitit.
