Krerët më të lartë të politikës shqiptare dhe greke kanë marrë pjesë në ceremoninë mortore të Kryepeshkopit të Kishës Ortodokse Autoqefale të Shqipërisë, Anastas Janullatos.
Në këtë ceremoni lamtumire, e mbajtur në Katedralen Ortodokse në Tiranë, ishin të pranishëm personalitete të shumta nga politika, diplomacia dhe komuniteti fetar. Mes të pranishmëve spikatën kryeministri i Shqipërisë, Edi Rama, lideri i opozitës, Sali Berisha, dhe kryeministri grek, Kyriakos Mitsotakis.
Prania e liderëve të lartë të politikës shqiptare dhe greke tregon rëndësinë që ka pasur Kryepeshkopi Janullatos për komunitetin ortodoks dhe për marrëdhëniet mes dy vendeve. Janullatos, i cili drejtoi Kishën Ortodokse Autoqefale të Shqipërisë për më shumë se tre dekada, njihet për kontributin e tij në ringritjen e besimit ortodoks në Shqipëri pas periudhës komuniste.
Ceremonia u zhvillua mes një atmosfere solemniteti dhe nderimi, ndërsa figura të shumta fetare dhe politike bënë homazhe dhe shprehën ngushëllimet e tyre për ndarjen nga jeta të Kryepeshkopit Janullatos.
