Në kuadër të Tetorit Rozë, muajit të ndërgjegjësimit ndaj kancerit të gjirit, Bashkia Devoll organizoi sot një fushatë sensibilizuese në bashkëpunim me Drejtorinë e Shërbimit Social, Shëndetësor dhe Strehimit, Gjimnazin “Fuat Babani” dhe Drejtorinë e Shërbimit Spitalor Devoll. Aktiviteti synonte ndërgjegjësimin e komunitetit për rëndësinë e zbulimit të hershëm të kancerit të gjirit.
Nën moton “Duaje veten, kontrollohu në kohë”, organizatorët shpërndanë fletëpalosje informuese dhe fjongo rozë, simbol i solidarizimit me gratë që përballen me këtë sëmundje. Qytetarët u inkurajuan të kryejnë kontrolle të rregullta mjekësore, duke theksuar se zbulimi i hershëm është thelbësor për shpëtimin e jetës.
Fushata është pjesë e projektit “Rinisim të lexojmë dhe argëtohemi së bashku”, financuar nga programi i përbashkët i OKB-së “Askush të mos mbetet pas” (Leave No One Behind), mbështetur nga Agjencia Zvicerane për Zhvillim dhe Bashkëpunim (SDC).
Postimi i bashkisë Devoll;
Tetori Rozë
Të bashkuar për të njejtën #kauzë
“Drejtoria e Shërbimit Social, Shëndetësor dhe Strehimit” në bashkëpunim me Gjimnazin “Fuat Babani” dhe “Drejtorinë e Shërbimit Spitalo Devoll, organizoi ditën e sotme një Fushatë Sensibilizuese në Bashkinë Devoll në kuadër të muajit Tetor, si “Muaji i ndërgjegjësimit ndaj kancerit të gjirit”.
Nën moton “Duaje veten, kontrollohu në kohë”, u shpërndanë informacione e fletëpalosje në komunitet dhe fjongo në shenjë solidarizimi për këtë kauzë.
Kontrollohuni tek mjeku dhe Mbrohuni nga kanceri i gjirit, zbulimi i hershëm ju shpëton jetën.
Ky aktivitet u organizua në kuadër të zbatimit të Projektit “Rinisim të lexojmë dhe argëtohemi së bashku”, financuar nga programi i përbashkët i OKB-së, “Askush të mos mbetet pas / Leave no one behind” (LNB2), të mbështetur nga Agjencia Zvicerane për Zhvillim dhe Bashkëpunim/SDC.
