Një reagim i fortë ka ardhur nga eksperti i pasurive të paluajtshme, Gerhard Kreka, përmes një postimi të publikuar në profilin e tij në Facebook, ku kritikon ashpër praktikat e gabuar në tregun imobiliar shqiptar, veçanërisht fryrjen e çmimeve të pronave nga agjentët.
“Mjaft më me mashtrime – po e helmoni tregun imobiliar!”, shkruan Kreka, duke e cilësuar listimin e pronave me çmime të fryra si mashtrim, dhe jo si “gabim” apo “strategji”.
“Nuk po ndihmoni pronarët – po i mashtroni.
Nuk po i shërbeni blerësve – po i largoni nga tregu.
Nuk po rrisni vlerën e tregut – po e shkatërroni,” – thekson ai në mesazhin e tij të drejtpërdrejtë.
Sipas tij, një apartament në një zonë që nuk e justifikon një çmim të caktuar, nuk mund të listohen në vlera të fryra vetëm sepse “ashtu e kërkon pronari”. Kreka i bën thirrje agjentëve imobiliarë të mos e quajnë veten profesionistë nëse nuk kanë guximin t’u tregojnë klientëve të vërtetën mbi vlerën reale të pronës.
“Ky është abuzim me besimin. Është arsyeja pse klientët nuk na marrin seriozisht,” shkruan ai, duke e quajtur situatën si një nga faktorët kryesorë që po dëmton reputacionin e profesionistëve të ndershëm në këtë fushë.
Në përfundim, Kreka i bën thirrje komunitetit të agjentëve që të tregojnë etikë në punën e tyre dhe të mos kontribuojnë në deformimin e tregut:
“Vetëm tregu vendos – dhe tregu është i lodhur nga gënjeshtrat.”
Deklarata e tij ka marrë vëmendje të gjerë në rrjet, duke hapur sërish debatin për etikën në fushën e pasurive të paluajtshme dhe për nevojën e një rregullimi më të drejtë të tregut.
Ja reagimi i tij i plotë;
Mjaft më me mashtrime – po e helmoni tregun imobiliar!
Po e them troç:
Listimi i pronave me çmime të fryra është mashtrim.
Jo gabim. Jo “strategji”. Mashtrim.
Nuk po ndihmoni pronarët – po i mashtroni.
Nuk po i shërbeni blerësve – po i largoni nga tregu.
Nuk po rrisni vlerën e tregut – po e shkatërroni.
Të gjithë e dimë:
Një apartament në një lagje që s’vlen më shumë se 800 €/m², nuk listohet 1,200 €/m² sepse “ashtu e kërkon pronari”.
Dhe asnjë profesionist i ndershëm nuk e pranon këtë justifikim.
Ky është abuzim me besimin.
Është arsyeja pse klientët nuk na marrin seriozisht.
Është çfarë po na prish punën të gjithëve që punojmë me etikë.
Nëse nuk ke guxim t’i thuash pronarit tënd që çmimi i tij nuk qëndron, mos e quaj veten agjent.
Jo çdo pronë meriton të listohen. Jo çdo pronar meriton të kënaqet.
Vetëm tregu vendos – dhe tregu është i lodhur nga gënjeshtrat.
