Gjatë një jave monitorimi intensiv me pajisje inteligjente në të gjitha akset e qarkut, Policia Rrugore e Korçës ka arrestuar 2 drejtues mjetesh, ka proceduar penalisht 6 të tjerë dhe ka vendosur 915 masa administrative. Këto kontrolle synojnë parandalimin e aksidenteve dhe menaxhimin e trafikut në rrugët urbane, interurbane dhe rurale.
Sipas njoftimit zyrtar, 2 drejtues mjetesh u arrestuan dhe 6 të tjerë u proceduan penalisht për veprat “Drejtimi i mjeteve në mënyrë të parregullt” dhe “Shkelja e rregullave të qarkullimit rrugor”.
Parkimet e gabuara dhe parakalimet në krye të shkeljeve
Nga 915 gjobat e vendosura në total, numrin më të lartë e mbajnë ndalimet e gabuara të mjeteve me 374 masa, pasuar nga 147 masa për parakalime të gabuara. Gjithashtu, policia ka ndëshkuar 52 shoferë për mosrespektim të këmbësorëve në vijat e bardha, 24 për mosvendosjen e kaskës mbrojtëse dhe 17 për mosvendosjen e rripit të sigurimit.
Bilanci javor përfshin edhe 7 masa për xhama të errësuar, 4 për drejtim mjeti nën efektin e alkoolit, 3 për përdorim të celularit, si dhe 287 masa për shkelje të tjera të Kodit Rrugor. Policia e Korçës bën apel për zbatimin me rigorozitet të rregullave dhe fton qytetarët të denoncojnë çdo shkelje në numrin pa pagesë 112, ndërsa thekson se kontrollet me mjete bashkëkohore logjistike do të vijojnë pa ndërprerje.
